...Ciato supra la crita e fìci l'omu...
«Ha travagghiari, omu, cu suduri!»
E l'omu s'arrabbatta pi campari,
e puru di la crita iddu si servi
comu fìci lu Granni Stazzunaru.
Ma pi fari chi cosa, criaturi?
Iddu è na cosa nica, un cicercu,
è na muddica di lu pani santu.
Eppuru cu la crita iddu cci campa.
Lu pedi nto pidali di lu tòrniu,
li manu ch'accarizzanu la crita
- vagnata ed allisciata cu mastria -
assemi a lu suduri chi l'allustra
vannu figghiannu bbùmmuli e lanceddi,
e ggiarri cu quartari e varilocchi,
e canali e maduna e tanti lemmi.
E lu cori s'allarga di prijzza...
Lu Granni Stazzunaru fìci l'omu,
lu Stazzunaru nicu fa lanceddi
ca, chini d'acqua, astutanu la siti
di cu di crita è fattu e d'idda campa.

Biagio Scrimizzi

Da Manu cu manu - Edizioni Ila Palma - Palermo